Սույն Բաժանորդային համաձայնագիրը (այսուհետ՝ «Համաձայնագիր») կանոնակարգում է «E-Teacher -- օտար լեզուների դասընթացներ» բջջային հավելվածի (այսուհետ՝ «Ծառայություն») օգտագործման շրջանակում Ծառայության բաժանորդի (այսուհետ՝ «Բաժանորդ») հետ հարաբերությունները:

Սույն Բաժանորդային համաձայնագիրը համարվում է հանրային օֆերտա և կարող է Բաժանորդի կողմից ընդունվել միայն վերջինիս ամբողջությամբ միանալու դեպքում: 

Սույն Համաձայնագրում օգտագործվող տերմինները և սահմանումները

«E-Teacher» ծառայությունը (այսուհետ՝ «Ծառայություն») կլիենտ-ծրագրերի և տեխնիկական և տեխնոլոգիական լուծումների շարք է, որի միջոցով Բաժանորդին հասանելի է դառնում Կոնտենտը: Ծառայությունը հասանելի է mts.am վեբ-կայքում, «Google Play» խանութում «Е-Teacher» անվանումով, ինչպես նաև տեղադրված է Օպերատորի բջջային հեռախոսների վրա:

Բաժանորդ՝ անձ, որի հետ Օպերատորը կնքել է պայմանագիր կապի ծառայությունների մատուցման վերաբերյալ (այսուհետ՝ «Պայմանագիր»), և որին տրվում է առնվազն մեկ Բաժանորդային համար և նույնականացման եզակի կոդ: Բաժանորդը մուտք է գործում Ծառայության հարթակ ինտերնետի միջոցով, անցնում է գրանցման գործընթաց և իրականացնում է Համաձայնագրի Ակցեպտ:

Օպերատոր՝ «ՄՏՍ Հայաստան» ՓԲԸ (իրավաբանական հասցե՝ Արգիշտի 4/1, ք. Երևան 0015, ՀՀ, էլեկտրոնային փոստ՝ info@mts.am), որը կապի ծառայություններ է մատուցում համապատասխան լիցենզիաների հիման վրա:

Կատարող՝ «ՎիաՄոբի» ՍՊԸ (իրավաբանական հասցե՝, փող. Զարեչնայա տուն 1, թաղ. 2, կառ. 187, գրասենյակ, Մոսկվայի տարածաշրջան, ք. Իվանտեևկա, 141281, Ռուսաստան, էլեկտրոնային փոստ՝ support@vmvostok.com), որը հանդիսանում է Բովանդակության օրինական իրավատերը և տրամադրում է ծառայությունների մատուցման տեխնիկական աջակցություն (ներառյալ՝ համապատասխան ծրագրային ապահովումների մշակումը և դրանց հետագա արդիականացումը) և ապահովում է Ծառայության հասանելիությունը:

Համաձայնագրի Ակցեպտ՝ Ծառայության փաստացի օգտագործում, ինչպես նաև Բաժանորդի համարի գրանցման գործընթացի իրականացում, որի միջոցով Բաժանորդը հաստատում է իր համաձայնությունը Համաձայնագրի պայմանների հետ: Համաձայնագրի Ակցեպտից հետո սույն Համաձայնագրի պայմանները համարվում են Բաժանորդի կողմից անվերապահորեն և ամբողջությամբ ընդունված:

Բովանդակության ծառայություն՝ Օպերատորի լրացուցիչ ծառայություն, որը Բաժանորդների համար անգլերեն լեզվի ուսուցման ծրագրին մուտքի տրամադրման կազմակերպումն է: Բովանդակության ծառայությունը կարող է բաժանորդներին տրամադրվել նաև անմիջապես SMS Բաժանորդագրության միջոցով, առանց բջջային հավելվածի կիրառման:

Բովանդակություն՝ բառեր և բառակապակցություններ, ձայնագրություններով թեմատիկ բառարան, ինչպես նաև այլ տեքստեր, որոնց հասանելիությունն ապահովվում է Ծառայության միջոցով:

Բաժանորդի համար՝ հեռախոսահամար, որը բաժանորդային պայմանագրի շրջանակում տրամադրվում է Բաժանորդին, որի միջոցով իրականացվում է Բաժանորդի սարքավորման և դրա մեջ տեղադրված SIM քարտի նույնականացում:

Բաժանորդի սարքավորում՝ բաժանորդի՝ հանրային շարժական (բջջային) կապի ցանցերի փոխանցող և ընդունող սարք, բջջային հեռախոսներ, սմարթֆոններ:

Տարածք՝ Հայաստանի Հանրապետության տարածքը:

Բաժանորդագրություն՝ Բաժանորդին որոշակի ժամանակահատվածով փորձնական օգտագործման հնարավորության և Բովանդակության մուտքի տրամադրում որոշակի ժամանակահատվածի համար՝ սահմանված վճարի դիմաց:

1. ՀԻՄՆԱԿԱՆ ԴՐՈՒՅԹՆԵՐ

1.1. Սույն Համաձայնագիրը հանդիսանում է Օպերատորի հրապարակային օֆերտա, որը սահմանում է Բաժանորդին Ծառայության մուտքի տրամադրման ընդհանուր պայմանները:

1.2. Բաժանորդը լիարժեք պատասխանատվություն է կրում Ծառայության աղբյուրներում իր կողմից ներկայացված տեղեկատվության հավաստիության համար:

1.3. Բաժանորդը երաշխավորում է, որ ունի սույն Համաձայնագրի ընդունման և իրականացման լիարժեք իրավունք և լիազորություն:

2. ՀԱՄԱՁԱՅՆԱԳՐԻ ԱՌԱՐԿԱՆ

2.1. Օպերատորը Բաժանորդներին տրամադրում է Բովանդակության ծառայություն Բաժանորդներին Բովանդակությանը մուտք տրամադրելու միջոցով՝ Բաժանորդների կողմից սույն Համաձայնագրի պայմանների կատարման պայմանով: Օպերատորն իրականացնում է Բովանդակության ծառայության տրամադրումը Ծառայության միջոցով՝ օգտագործելով Օպերատորի ցանցի ռեսուրսները:

2.2. Ծառայությունը ստանալու համար Բաժանորդը պարտավոր է սույն Համաձայնագրով սահմանված կարգով հաստատել, որ կարդացել է, հասկացել է և համաձայն է հետևել սույն Համաձայնագրի պայմաններին և միանալ սույն Համաձայնագրին Համաձայնագրի ակցեպտի միջոցով: Բաժանորդի կողմից սույն Համաձայնագրի Ակցեպտի պահից սկսած սույն Համաձայնագիրը համարվում է Բաժանորդի հետ կնքված, և Բաժանորդը ձեռք է բերում սույն Համաձայնագրով նախատեսված իրավունքներն ու պարտականությունները: Համաձայնագրի Ակցեպտի համար Բաժանորդը պետք է իրականացնի գրանցման գործընթաց՝ սեղմելով հղումը:

2.3. Ծառայության հարթակում Բաժանորդագրությունից հետո Բաժանորդը համաձայնում է սույն Համաձայնագրի պայմաններին:

2.4. Եթե Բաժանորդը սկսում է օգտվել Ծառայությունից/դրա առանձին գործառույթներից, ապա համարվում է, որ նա ամբողջովին ընդունել է սույն Համաձայնագրի դրույթները՝ առանց վերապահումների կամ բացառությունների: Եթե Բաժանորդը համաձայն չէ սույն Համաձայնագրում նշված որևէ դրույթի հետ, Բաժանորդը պետք է անհապաղ դադարեցնի Ծառայության օգտագործումը:

2.5. Օպերատորն իրավունք է վերապահում իր հայեցողությամբ փոփոխել և (կամ) լրացնել սույն Համաձայնագրի դրույթները ցանկացած ժամանակ՝ առանց Բաժանորդին այդ մասին նախօրոք և (կամ) հետո ծանուցելու: Համաձայնագրի գործող տարբերակը հասանելի է Ծառայության հարթակում: Ծառայությունների հետագա օգտագործումը նման ցանկացած փոփոխությունից հետո նշանակում է, որ Բաժանորդը համաձայն է նման փոփոխությունների և/կամ լրացումների հետ: Բաժանորդն անձնական պատասխանատվություն է կրում Ծառայության պարբերական վերանայման համար՝ սույն Համաձայնագրի ընթացիկ տարբերակի հետ ծանոթանալու նպատակով: Համաձայնագրի թարմացված տարբերակն ուժի մեջ է մտնում Ծառայությունում դրա հրապարակման պահից: Հետևաբար, Բաժանորդներին տրամադրվում է կանոնավոր մուտք սույն Համաձայնագրի գործող տարբերակին:

2.6. Բոլոր կիրառվող և Ծառայության հարթակում տեղադրված մտավոր գործունեության արդյունքները, ինչպես նաև Ծառայությունն ինքնին հանդիսանում են իրենց օրինական իրավատերերի մտավոր սեփականություն և պաշտպանված են Հայաստանի Հանրապետության մտավոր սեփականության մասին օրենքներով, ինչպես նաև Հայաստանի Հանրապետության կողմից վավերացված համապատասխան միջազգային իրավական կոնվենցիաներով: Ծառայության հարթակում տեղադրված մտավոր գործունեության արդյունքների ցանկացած օգտագործումը (այդ թվում՝ Ծառայության վիզուալ ձևավորման տարրերը, խորհրդանիշները, տեքստերը, գրաֆիկական պատկերները, նկարները, լուսանկարները և այլ օբյեկտներ) սույն Համաձայնագրի շրջանակից դուրս առանց Օպերատորի և/կամ օրինական իրավատիրոջ թույլտվության անօրինական է և կարող է պատճառ հանդիսանալ դատական վարույթ սկսելու և խախտողներին քաղաքացիաիրավական, վարչական և քրեական պատասխանատվության ենթարկելու համար՝ Հայաստանի Հանրապետության օրենսդրությանը համապատասխան:

2.7. Օպերատորը  ոչ մի պատասխանատվություն չի կրում Ծառայության Բովանդակության բնույթի համար, որը մտավոր սեփականության իրավունքի հիման վրա պատկանում է երրորդ անձանց:

2.8. Բաժանորդն իրավունք չունի վերարտադրել, կրկնել, պատճենել, վաճառել, վերավաճառել կամ ցանկացած այլ ձևով  որևէ առևտրային նպատակով օգտագործել Ծառայության (Ծառայության հարթակում տեղադրված մտավոր գործունեության արդյունքներ) և (կամ) դրա որևէ մասի բովանդակությունը առանց Ծառայության իրավատիրոջ համաձայնության:

2.9. Համաձայնագրի Ակցեպտով Բաժանորդը Օպերատորին տալիս է իր համաձայնությունը՝ գրանցման պահին նշված Բաժանորդային համարով ստանալու  հաղորդագրություններ, այդ թվում՝ գովազդային, Ծառայության հարթակում կատարված հետևյալ ընդհանուր իրադարձությունների մասին. նոր Բովանդակության տեղադրում, նոր ներկայացված հատուկ առաջարկներ, պրոմո ակցիաներ, ինչպես նաև սույն Համաձայնագրի կատարման հետ կապված այլ տեղեկություններ:

2.10. Համաձայնագրի ակցեպտով Բաժանորդն արտահայտում է իր համաձայնությունն առ այն, որ Օպերատորը կարող է հավաքագրել և օգտագործել գրանցման արդյունքում ստացված Բաժանորդի մասին և Բաժանորդի կողմից օգտագործված Բովանդակության ծառայության մասին ցանկացած առանձին տեղեկություն կամ բոլոր տեղեկությունները: Օպերատորն իրավունք ունի օգտագործել այդ տեղեկությունները հաշիվների դուրսգրման, տեխնիկական սպասարկման, կոնֆլիկտների լուծման, մարքեթինգի կամ նմանատիպ այլ նպատակների համար: Օպերատորը պարտավորվում է ձեռնարկել բոլոր անհրաժեշտ գործողությունները և միջոցները Բաժանորդի տեղեկատվության պաշտպանությունն ապահովելու համար՝ անձնական տվյալների պաշտպանության վերաբերյալ Հայաստանի Հանրապետության օրենսդրությանը համապատասխան:

2.11. Ընդունելով սույն Բաժանորդային համաձայնագիրը՝ Բաժանորդը համաձայնում է անձնական տվյալների (այդ թվում`բաժանորդի համարի մասին տեղեկությունների (MSISDN)) փոխանցմանը Օպերատորին և/կամ երրորդ անձանց, որոնք տրամադրում են ծառայությունների մատուցման տեխնիկական աջակցություն (ներառյալ՝ համապատասխան ծրագրային ապահովումների մշակումը և դրանց հետագա արդիականացումը) և ապահովում են Ծառայության հասանելիությունը Ծառայության օգտագործման ողջ ժամանակահատվածի համար:

2.12. Բաժանորդների անհատական տվյալները, որոնք ստացվել են Բովանդակության ծառայությունների և Ծառայության մատուցման շրջանակում, ենթակա են հեռացման բաժանորդագրության ապաակտիվացման պահից 1 (մեկ) տարի անց:

2.13. Ծառայությունը Բաժանորդին առաջարկում է բջջային հավելվածի օգնությամբ նոր բառեր և արտահայտություններ սովորելու, ինչպես նաև Ծառայությունն առանց բջջային հավելվածի (SMS) օգտագործելու հնարավորություն: Ծառայության ներկայիս բոլոր գործառույթները, ինչպես նաև դրա ցանկացած զարգացում և/կամ նոր Բովանդակության ավելացում հանդիսանում են սույն Համաձայնագրի առարկան:

2.14. Բաժանորդը համաձայնում է, որ Ծառայության հավելվածում ուսուցումից հետո նա չի կարող պահանջել այդ ուսումը հաստատող որևէ վկայագիր կամ դիպլոմ:

2.15. «E-Teacher» ապրանքանիշը և «E-Teacher» տարբերանշանը գրանցված ապրանքային նշաններն են և ոչ մի պարագայում չպետք է վերարտադրվեն առանց դրանց օրինական սեփականատերերի գրավոր ուղղակի թույլտվության:

2.16. Եթե Ծառայության հարթակում Բաժանորդը թարգմանում է նախադասություն բառերի և արտահայտությունների փոխարեն, տրամադրված թարգմանության հիմնական աղբյուրները հանդիսանում են «Google»-ը և «Yandex Translator»-ը: Բառերի և արտահայտությունների համար սկզբում ստուգվում է տվյալների բազան, ապա «Google»-ը: Եթե տվյալ բառը/արտահայտությունը կամ նախադասությունը այնտեղ առկա չէ, ապա այն ստուգվում է «Yandex»-ում: Նախադասությունների դեպքում նախ ստուգվում է «Google»-ը, այնուհետև՝ «Yandex»-ը, իսկ չգտնվելու դեպքում նշվում է, որ այդպիսի բառ  գոյություն չունի:

3. ԲՈՎԱՆԴԱԿՈՒԹՅԱՆ ԾԱՌԱՅՈՒԹՅԱՆ ԱԿՏԻՎԱՑՄԱՆ ԵՎ ԱՊԱԱԿՏԻՎԱՑՄԱՆ ԿԱՐԳԸ

3.1. Բովանդակության ծառայության ակտիվացումը կատարվում է այն բանից հետո, երբ բաժանորդը նախաձեռնում է կապ և հաստատում է Ծառայությունն ակտիվացնելու ցանկությունը: Ծառայությունն ակտիվացնելու համար Բաժանորդը պետք է կատարի նշված գործողություններից մեկը.

• Ուղարկի [1] բովանդակությամբ SMS հաղորդագրություն 45678 կարճ համարին:
• Բջջային հավելվածում սեղմի առաջարկվող «Ցանկանում եմ բաժանորդագրվել» կոճակը:

3.2. Հարցումներն ուղարկվում են Բաժանորդների հեռախոսներից Օպերատորի ցանց SMS հաղորդագրություններ ուղարկելու միջոցով: Ի պատասխան Բաժանորդը ստանում է SMS ծանուցում Բաժանորդագրության պայմանների վերաբերյալ:

3.3. Սույն Համաձայնագրում գրանցում նշանակում է Բաժանորդի գրանցման հաշվի ակտիվացում՝ մուտքագրելով Բաժանորդի համարը և կոդը (SMS հաղորդագրության միջոցով ստացված) Ծառայության ինտերֆեյսի հատուկ դաշտում, որը տրամադրվում է Բաժանորդին Ծառայության հարթակում գրանցման ժամանակ:

3.4. Բաժանորդը ցանկացած պահի կարող է դադարել օգտվել Ծառայությունից, առանց բացատրելու պատճառները՝ հետևելով Ծառայության հարթակում նշված հրահանգներին: Բաժանորդագրությունը հնարավոր է դադարեցնել Ծառայությունն անջատելու միջոցով՝ միակողմանի հրաժարվելով այդ ծառայությունը ստանալուց: Բաժանորդագրության անջատումը Բաժանորդի կողմից իրականացվում է ինքնուրույն՝ հետևյալ եղանակներից որևիցե մեկով՝

ա) «E-Teacher» հավելվածի «Իմ հաշիվը» բաժնի միջոցով,

բ) Ուղարկելով «OFF» բովանդակությամբ SMS հաղորդագրություն 45678 համարին:

4. ԲԱԺԱՆՈՐԴԱԳՐՈՒԹՅԱՆ ԳԻՆԸ ԵՎ ՊԱՅՄԱՆՆԵՐԸ

4.1. Սույն Համաձայնագրի պայմանների համաձայն վճարովի Բովանդակությանը մուտքի իրավունքը տրամադրվում է Բաժանորդին Բաժանորդագրության ձևակերպման պայմանով:

Բաժանորդագրության շրջանակում Օպերատորը Բաժանորդին ընձեռում է երկօրյա ժամանակահատվածով փորձնական օգտագործման հնարավորություն, իսկ դրանից հետո վճարովի Բովանդակության մուտքի հնարավորություն բաժանորդագրության ժամանակահատվածի համար, որը կազմում է 1 (մեկ) օրացուցային օր: Բաժանորդի կողմից Բաժանորդագրությունը դադարեցնելու հայտ չստանալու դեպքում Բաժանորդագրության տրամադրման ժամկետը ամեն անգամ ավտոմատ կերպով երկարաձգվում է 1 (մեկ) օրացուցային օրով մինչև Բաժանորդի կողմից Բաժանորդագրության ինքնուրույն դադարեցումը: 

4.2. Օրական Բաժանորդագրության արժեքը կազմում է 40 ՀՀ դրամ (ներառյալ՝ ԱԱՀ): Գումարն ավտոմատ կերպով գանձվում է Բաժանորդի հաշվից: Ծառայության տրամադրման սակագների, արժեքների և պայմանների վերաբերյալ մանրամասն տեղեկատվություն կարելի է ստանալ 111 համարից, որն անվճար է Վիվա-ՄՏՍ-ի բաժանորդների բջջային հեռախոսներից կատարված զանգերի դեպքում:

4.3. Եթե Բաժանորդագրության երկարաձգման փորձի պահին Բաժանորդի հաշվին չկան բավարար միջոցներ Բովանդակության ծառայության ամբողջական վճարումն իրականացնելու համար, ծառայությունները չեն ակտիվացվում/չեն երկարաձգվում:

4.4. Բաժանորդագրության երկարաձգման հաջորդ փորձերը կատարվում են օրական 2 անգամ 30 (երեսուն) օրացուցային օրվա ընթացքում: 30 (երեսուն) օրացուցային օր ժամկետի ավարտից հետո Բաժանորդի հաշվին արժեքի վճարման համար բավարար դրամական միջոցների համալրման բացակայության դեպքում փորձը դադարեցվում է:

4.5. Ինտերնետի վճարը (տեղական և ռոումինգում) գանձվում է Բաժանորդի սակագնային պլանի համաձայն:

4.6. Բաժանորդի հաշվից գումար չի գանձվում իր կողմից կարճ համարներին (լեզվի ուսուցում SMS-ի միջոցով) ուղարկված և/կամ դրանցից ստացած բոլոր SMS հաղորդագրությունների համար, բացառությամբ օրական Բաժանորդագրության SMS հաղորդագրությունների:

4.7. Բաժանորդագրության արժեքը կարող է փոփոխվել Օպերատորի կողմից ցանկացած պահի առանց Բաժանորդի համաձայնության՝  eteacher.mts.am վեբ-կայքում Բաժանորդներին նախնական ծանուցմամբ կամ ցանկացած այլ եղանակով՝ Օպերատորի հայեցողությամբ:

4.8. Ինտերնետի մուտքի իրավունքի ձեռք բերման, համապատասխան սարքի գնման և դրա կարգավորման հետ կապված բոլոր հարցերը բաժանորդը լուծում է ինքնուրույն: Այդ հարցերը չեն կարգավորվում սույն Համաձայնագրով:

5. ԿՈՂՄԵՐԻ ԻՐԱՎՈՒՆՔՆԵՐԸ ԵՎ ՊԱՐՏԱԿԱՆՈՒԹՅՈՒՆՆԵՐԸ

5.1. Բաժանորդի իրավունքները.

5.2. Ամբողջ ծավալով օգտվել բոլոր ֆունկցիոնալ հնարավորություններից, որոնք տրամադրվում են Ծառայության միջոցով Բովանդակության ծառայություններ ստանալիս:

5.3. Բաժանորդի պարտականությունները.

5.3.1. Հետևել սույն Համաձայնագրի պայմաններին:

5.3.2. Բաժանորդը երաշխավորում է, որ չափահաս է:

5.3.3. Բաժանորդը գիտակցում է, որ Ծառայությունը կարող է պարունակել այնպիսի նյութեր, որոնք ուղղված են միայն չափահաս Բաժանորդներին:

5.3.4. Չիրականացնել գործողություններ, որոնք արգելվում են սույն Համաձայնագրով և Հայաստանի Հանրապետության օրենսդրությամբ:

5.3.5. Չկատարել որևէ գործողություն`ուղղված Ծառայության աշխատանքի ապակայունացմանը, չփորձել առանց համապատասխան լիազորության մուտք գործել Ծառայություն, դրա վրա տեղադրված մտավոր գործունեության արդյունքներ, ինչպես նաև չկատարել այլ գործողություններ, որոնք խախտում են Օպերատորի և/կամ երրորդ անձանց իրավունքները:

5.4. Օպերատորի իրավունքները.

5.4.1. Բաժանորդի կողմից սույն Համաձայնագրի և/կամ Հայաստանի Հանրապետության օրենսդրության խախտման դեպքում միակողմանիորեն կասեցնել, սահմանափակել և դադարեցնել Բաժանորդի մուտքը Ծառայության ցանկացած բաժնին կամ բոլոր բաժիններին, ինչպես նաև արգելափակել Բաժանորդի կողմից Ծառայությունն օգտագործելու հնարավորությունը (արգելափակել գրանցումը և/կամ IP հասցեները) ցանկացած պահի, նախնական ծանուցմամբ կամ առանց դրա, պատասխանատվություն չկրելով ցանկացած վնասի համար, որը կարող է հասցվել Բաժանորդին նման գործողություններով (այդ թվում՝ ամբողջովին դադարեցնել Համաձայնագիրը՝ Բաժանորդի գրանցման հաշիվը Ծառայությունից հեռացնելով):

5.4.2. Սույն Համաձայնագրի շրջանակում իրավունքների ու պարտականությունների իրականացման նպատակով ներգրավել ցանկացած երրորդ կողմ:

5.4.3. Գործադրել այլ իրավունքներ, որոնք նախատեսված են սույն Համաձայնագրով և/կամ Հայաստանի Հանրապետության օրենսդրությամբ:

5.5. Օպերատորի պարտականությունները.

5.5.1. Բաժանորդի համար ապահովել տեխնիկական հնարավորություն Տարածքի սահմաններում սույն Համաձայնագրով սահմանված կարգով Ծառայություն ստանալու համար,

5.5.2. Իրականացնել Ծառայության բաժինների ընթացիկ կառավարում:

5.5.3. Բաժանորդին տրամադրվում է Ծառայության մուտք «ինչպես որ կա» (as is) սկզբունքով, ընդ որում, Օպերատորը չի տրամադրում երաշխիքներ կամ հավաստիացումներ դրա օգտագործման և շահագործման առնչությամբ:

6. ԲԱԺԱՆՈՐԴԻ ԵՐԱՇԽԻՔՆԵՐԸ ԵՎ  ՊԱՏԱՍԽԱՆԱՏՎՈՒԹՅՈՒՆԸ

6.1.1. Բաժանորդը լիարժեք անձնական պատասխանատվություն է կրում այն բանի համար, որ իր կողմից օգտագործվող Բովանդակությունը և Ծառայության հարթակում տեղակայված այլ տեղեկություններ համապատասխանեն Հայաստանի Հանրապետության կամ միջազգային օրենսդրության նորմերին (այդ թվում՝ մտավոր սեփականության իրավունքի և տեղեկատվության պաշտպանության մասին նորմերին):

6.1.2. Բաժանորդը լիարժեք պատասխանատվություն է կրում մուտքանվան և գաղտնաբառի անվտանգության համար, ինչպես նաև այն բոլոր գործողությունների համար, որոնք կատարվելու են նրա կողմից Ծառայության հարթակում իր մուտքանունով և գաղտնաբառով գրանցվելուց հետո: Օպերատորը պատասխանատվություն չի կրում Բաժանորդի կողմից սույն Համաձայնագրի դրույթների խախտման պատճառով առաջացած տվյալների հնարավոր կորստի կամ վնասման համար:

6.1.3. Բաժանորդը պարտավոր է անմիջապես Օպերատորին ծանուցել իր գրանցման հաշվից երրորդ անձանց կողմից Ծառայության մուտքի ցանկացած դեպքի մասին և/կամ անվտանգության որևէ խախտման մասին:
 Առանց Օպերատորի համաձայնության Բաժանորդն իրավունք չունի Ծառայության գրանցման հաշիվը փոխանցել, զիջել, վաճառել երրորդ անձի կամ փոխանցել նրա օգտագործմանը:

6.1.4. Երրորդ անձին մուտքանվան/գաղտնաբառի փոխանցման դեպքում Բաժանորդին և/կամ Օպերատորին պատճառված ցանկացած վնասի համար անմիջական պատասխանատվություն է կրում Բաժանորդը: Օպերատորը պատասխանատվություն չի կրում Բաժանորդի գրանցման հաշվի չլիազորված մուտքի հետևանքով պատճառված վնասի համար:

6.1.5. Բաժանորդը Օպերատորի առաջ պատասխանատվություն է կրում սույն Համաձայնագրի պայմանների կատարման համար:

6.1.6. Ծառայության Բաժանորդը ընդունում և համաձայնում է, որ Օպերատորը կարող է իր հայեցողությամբ, ցանկացած պատճառով կամ առանց պատճառի հեռացնել կամ տեղափոխել (առանց նախազգուշացման) Ծառայության հարթակում տեղադրված մտավոր գործունեության ցանկացած արդյունք՝ առանց մտավոր գործունեության արդյունքների հեռացման կամ տեղափոխման որևէ սահմանափակման:

7. ԱՆՀԱՂԹԱՀԱՐԵԼԻ ՈՒԺԻ ԱԶԴԵՑՈՒԹՅՈՒՆ (ՖՈՐՍ-ՄԱԺՈՐ)

Կողմերը պատասխանատվություն չեն կրում սույն Համաձայնագրի պարտավորություններն ամբողջությամբ կամ մասամբ չկատարելու կամ դրանց կատարումն ուշացնելու համար, եթե դա հետևանք է ջրհեղեղի, հրդեհի, երկրաշարժի, այլ բնական աղետի, պատերազմական գործողության, զինված հարձակման, պայթյունի, զանգվածային խռովության, գործադուլի, պետական մարմնի կողմից ընդունված ակտի, մայրուղային ենթակառուցվածքների խաթարման, էլեկտրասնուցման կրճատման կամ թերացած կողմի վերահսկողությունից դուրս այլ իրադարձության:

8. ԵԶՐԱՓԱԿԻՉ ԴՐՈՒՅԹՆԵՐ

8.1. Սույն Համաձայնագիրը, ինչպես նաև Օպերատորի և Բաժանորդի միջև հարաբերությունները կարգավորվում և մեկնաբանվում են ըստ Հայաստանի Հանրապետության գործող օրենսդրության: Սույն Համաձայնագրով չկանոնակարգվող հարցերը  կարգավորվում են Հայաստանի Հանրապետության օրենսդրության նյութական իրավունքի նորմերով:

8.2. Եթե սույն Համաձայնագրի ցանկացած դրույթ որևէ պատճառով անվավեր է կամ ուժը կորցրած, ապա դա չպետք է ազդի Համաձայնագրի մնացած պայմանների վավերականության կամ իրագործելիության վրա:

8.3. Կողմերը համաձայնում են, որ Կողմերի՝ սույն Համաձայնագրով կարգավորվող հարաբերություններից բխող բոլոր վեճերն ընդդատյա են Օպերատորի գտնվելու վայրի իրավասու դատարաններին՝ վեճերի կարգավորման մինչդատական ընթացակարգի պարտադիր կատարմամբ:

8.4. Ծառայությունից օգտվելու/օգտվելու անհնարինության, ինչպես նաև երրորդ անձանց իրավունքների և/կամ օրենսդրության հնարավոր խախտման հետ կապված բոլոր հարցերը, դիմումները և բողոքները պետք է փոխանցվեն info@mts.am հասցեին կամ 111 համարին, որն անվճար է Վիվա-ՄՏՍ-ի բաժանորդների բջջային հեռախոսներից կատարված զանգերի դեպքում: