Կորպորատիվ սոցիալական պատասխանատվությանը նվիրված սեմինար` ՎիվաՍել-ՄՏՍ-ի գլխամասային գրասենյակում

Շարունակելով հայաստանյան բուհերի հետ համագործակցության ծրագրերը, ՎիվաՍել-ՄՏՍ-ի գլխամասային գրասենյակում այսօր հյուրընկալվել էին մի շարք կրթօջախների 20 դասախոս, ովքեր, կիսելով այն համոզմունքը, որ աշխատաշուկայում աշխուժություն մտցնելու ամենաիրատեսական միջոցը շուկայի պահանջներին համապատասխան կադրեր դաստիարակելն է, պատրաստակամ են կոնկրետ քայլեր ձեռնարկել երկրի գիտատեխնիկական բազայի զարգացման ուղղությամբ:

 

Այս մոտեցմանը համահունչ, ՎիվաՍել-ՄՏՍ-ի նախաձեռնությամբ Կարիերայի զարգացման ծրագրի շրջանակներում հրավիրված արդեն երկրորդ սեմինարն անդրադարձավ կորպորատիվ պատասխանատվության թեմային:

 

«Մենք առաջնորդում ենք մեր օրինակով. մենք ձեր` գալիք սերնդին կրթող և վաղվա մարտահրավերներին դիմակայելուն նրան պատրաստող դասախոսների կարիքն ունենք, որպեսզի օգնենք նրանց հավատալ, որ իրենք կարող են սեփական ներդրումն ունենալ մեր ապագայի կառուցման հարցում: ՎիվաՍել-ՄՏՍ-ն իր ձևավորման առաջին իսկ օրվանից հավատացած է եղել, որ կորպորատիվ սոցիալական պատասխանատվությունը պետք է դրվի մեր գործունեության հիմքում և ուրախ ենք, որ այսօր շատ կազմակերպություններ հետևում են մեր օրինակին: Սակայն, անելիք դեռ շատ կա և դրա իրականացումը հնարավոր է միայն համապատասխան կրթության առկայության պարագայում»,-սեմինարի մասնակիցներին ասաց ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

 

Սեմինարից հետո ՎիվաՍել-ՄՏՍ-ի կորպորատիվ սոցիալական պատասխանատվության մասնագետի կողմից անցկացված քննարկումը, թիմային աշխատանքը և թեմայի մանրամասների ներկայացումը ընկերության գրասենյակում հյուրընկալված դասախոսներին հնարավորություն ընձեռեց նորովի բացահայտելու «կորպորատիվ պատասխանատվություն» հասկացության բուն նշանակությունը:

 

Այս հանդիպումը ևս մեկ անգամ ապացուցեց, որ կրթության և բիզնես ոլորտների համագործակցությունը կարող է նպաստավոր լինել:

 

Սպասեք ավելին: ՎիվաՍել-ՄՏՍ... Ավելին, քան օպերատոր: