Մեր պատմությունը

Վիվա-ՄՏՍ (գործունեության սկզբում՝ ՎիվաՍել) ընկերությունը («ՄՏՍ Հայաստան» ՓԲԸ) գործունեություն իրականացնելու արտոնագիր է ստացել 2004 թվականին: Գործունեությունն սկսելով 2005 թվականին փոքրաթիվ կազմով` գլխավոր տնօրեն Ռալֆ Յիրիկյանի ղեկավարությամբ,  թիմն իր առջև նպատակ էր դրել հնարավորինս սեղմ ժամկետներում բջջային ընդարձակ ցանց ապահովել ամբողջ հանրապետությունում ու սկսել ծառայություններ մատուցել:

Վիվա-ՄՏՍ-ի ներցանցային առաջին զանգը կատարվեց 2005 թ.-ի հուլիսի 1-ին` նոր դարաշրջանի սկիզբ ազդարարելով Հայաստանի հեռահաղորդակցության ոլորտում: Վիվա-ՄՏՍ-ի մուտքով Հայաստանում ավարտվեց բջջային կապի մենաշնորհը, սկիզբ առավ մրցակցությունն ու կարճ ժամանակահատվածում հիմնովին փոխվեց ոլորտում տիրող պատկերը: Վիվա-ՄՏՍ-ի առաջարկած բարձր որակի, մատչելի սակագների, հուսալիության և ընդարձակ ծածկույթի շնորհիվ՝ GSM ծառայությունները կարճ ժամանակահատվածում հասանելի դարձան Հայաստանի բնակչությանը:

2006 թ.-ին Վիվա-ՄՏՍ-ը շարունակում է զարգացնել ոչ միայն ցանցը, այլև՝ կազմակերպական կառուցվածքը: Կազմակերպության երկարաժամկետ ծրագրերի հիմքում բաժանորդներին ընձեռնվող հնարավորությունների և մատուցվող ծառայությունների որակի բարձրացումն էր: Աշխատանքներ էին տարվում բջջային ցանցի ընդարձակման և մարդկային ռեսուրսների հավաքագրման արդյունավետ քաղաքականության կիրառման ուղղությամբ: 2006 թվականի հունվարի դրությամբ՝ ընկերությանը հաջողվում է գրավել շուկայի մասնաբաժնի 50 տոկոսը (ավելի քան 350 000 բաժանորդ): Նույն թվականի սեպտեմբերին ընկերության բջջային ցանցը հասանելի էր երկրի բնակեցված տարածքի 90 տոկոսում:

2007 թվականի սեպտեմբերին, բաժնետոմսերի 80 տոկոսի վաճառքից հետո, ընկերությունը դարձավ ԱՊՀ տարածքում հեռահաղորդակցության խոշորագույն ընկերություններից մեկի` ռուսաստանյան «Մոբիլնիյե Տելեսիստեմի» («ՄՏՍ») ընկերության դուստր ձեռնարկություն: Նոր ռազմավարությանը, նպատակների սահմանմանը, ընդհանուր կորպորատիվ առաքելության ձևակերպմանը զուգահեռ` մշակվում է նաև Վիվա-ՄՏՍ-ի կազմակերպչական նոր կառուցվածքը:

2007 թվականին ընկերությունն արձանագրում է զարգացման զգալի առաջընթաց և բաժանորդային բազայի աճ. Վիվա-ՄՏՍ-ի ծառայություններից օգտվողների թիվը գերազանցում է 1 միլիոնը: Զուգահեռաբար ավելանում է աշխատակիցների թիվը:

2008 թվականին իրականացված քոբրենդինգի արդյունքում փոխվեց ընկերության ապրանքանշանը. ՎիվաՍել-ը դարձավ ՎիվաՍել-ՄՏՍ: Այդ տարվա ընթացքում ընկերությանը նաև հաջողվեց գրավել շուկայի զգալի մասնաբաժինը՝ գերազանցելով 78 տոկոսը:

2009 թվականի ապրիլին Վիվա-ՄՏՍ-ն ազդարարեց երրորդ սերնդի (3G) ցանցի կոմերցիոն մեկնարկը: Հայաստանում առաջին անգամ իրականացվեց 3G ցանցի գործարկում՝ մարզերում: Նաև առաջին անգամ Հայաստանում իրականացվում է 3G ցանցի ապահովում՝ Երևանի մետրոյի տարածքում:

Արդիականացված ցանցը բաժանորդներին հնարավորություն ընձեռեց օգտվելու Վիվա-ՄՏՍ-ի նորարարական այնպիսի ծառայություններից, ինչպիսիք են տեսազանգն ու շարժական գերարագ ինտերնետը:

Բջջային հեռահաղորդակցության ոլորտում Վիվա-ՄՏՍ-ի հաջողությունները պայմանավորված են գործունեության հետևյալ սկզբունքով. բջջային ծառայությունները պետք է հասանելի լինեն ոչ թե սահմանափակ թվով մարդկանց, այլ` յուրաքանչյուրին: Արտասահմանյան օպերատորների հետ ռոումինգային գործընկերության շնորհիվ, Վիվա-ՄՏՍ-ը հայրենիքի հետ կապ պահպանելու հնարավորություն է տալիս իր բաժանորդներին` անկախ գտնվելու վայրից: Վիվա-ՄՏՍ-ն ունի 529 ռոումինգ գործընկեր՝ աշխարհի 192 երկրում:

Վիվա-ՄՏՍ-ը 2010 թվականին Հայաստանում առաջին անգամ գործարկեց 4G/LTE ցանցը: Այն բաժանորդներին հնարավորություն է տալիս օգտվելու ինտերնետի անհամեմատ ավելի բարձր արագությունից և աշխատելու առավել բարձր արդյունավետությամբ:
Որպես պատասխանատու կորպորատիվ քաղաքացի՝ ընկերությունը բազայինկայաններ տեղադրելու որոշում կայացնելիս չի առաջնորդվել բացառապես ներդրումների վերադարձելիության սկզբունքով: Վիվա-ՄՏՍ-ի համար հավասարապես` սոցիալական և անվտանգության խնդիր է փոքրաթիվ բնակչությամբ և ծառայությունների սպառման փոքր հնարավորությամբ ամենահեռավոր շրջաններում անգամ հաղորդակցության հուսալի ենթակառուցվածքի ապահովումը:

Հիմնադրման օրվանից, Վիվա-ՄՏՍ-ի բոլոր աշխատակիցների համար կորպորատիվ սոցիալական պատասխանատվությունը (ԿՍՊ) եղել և մնում է ոչ միայն հայեցակարգ, այլև՝ ամենօրյա գործելակերպ: Վիվա-ՄՏՍ-ը Հայաստանում առաջին ընկերությունն է, որը ներկայացրել և կիրառել է ԿՍՊ-ն՝ որպես կառավարման մոդել և առաջին օպերատորն է, որն առաջնորդվում է սոցիալական պատասխանատվության միջազգային՝ ISO 26000 ուղեցույցներով:

Գործունեության ընթացքում, ԿՍՊ ռազմավարության շրջանակներում, Վիվա-ՄՏՍ-ն ավելի քան 29 միլիարդ դրամ է հատկացրել Հայաստանում սոցիալական ներդրումներ իրականացնելու նպատակով՝ հետևյալ ոլորտների բարելավման և կայուն զարգացման ուղղությամբ.

• առողջապահություն,
• մշակույթ,
• կրթություն,
• սպորտ,
• շրջակա միջավայր,
• խմելու և ոռոգման ջրագծեր, ներառյալ՝ սահմանամերձ համայնքներում,
• բնակարանաշինություն, ներառյալ՝ սահմանամերձ համայնքներում,
• այլընտրանքային էներգիայով սնվող՝ ջեռուցման ու լուսավորման LED համակարգեր,
• կամավորություն,
• հատուկ կարիքներով երեխաներ,
• բնակարանների տրամադրում աղետի գոտու 40 անտուն ընտանիքի,
• աջակցություն՝ տեղեկատվական ու հեռահաղորդակցական տեխնոլոգիաների ոլորտի, ներառյալ՝ ստարթափների զարգացմանը:

Վիվա-ՄՏՍ-ն ունի սեփական օպտիկամանրաթելային մալուխների ցանց, որը ձգվում է Հայաստանի հյուսիսից՝ հարավ: Ընկերությունն ինտերնետը ներկրում է իր սեփական օպտիկամանրաթելային կապուղիներով՝ ներքին շուկայի կարիքների համար:

2012 թվականին Վիվա-ՄՏՍ-ն ամրապնդեց իր դիրքերը նաև ֆինանսավճարային ծառայությունների շուկայում: Թողարկելով «ՄոբիԴրամ» էլեկտրոնային դրամապանակը, իսկ 2016 թվականին՝ նաև «ՄոբիԴրամ» բջջային հավելվածը` հաճախորդին հնարավորություն է ընձեռվել կատարելու անհպում ապահով վճարումներ՝ սմարթֆոնի միջոցով: Այսօր Վիվա-ՄՏՍ-ի առցանց խանութում ցանկացած սարք գնելիս վճարումը նույնպես կարելի է կատարել ՄոբիԴրամ-ով:

Վիվա-ՄՏՍ-ն անցել է մարտահրավերներով հարուստ ուղի՝ իր բջջային հզոր ցանցը հասանելի դարձնելով բնակչության 99.8%-ին: 2014 թվականին Վիվա-ՄՏՍ-ի բջջային ինտերնետի բաժանորդների թիվը հասնում էր 1 միլիոնի և ընկերությունն ուներ շուկայի մասնաբաժնի ավելի քան 60%-ը:

Մեծ կարևորություն տալով տեղեկատվական անվտանգությանը՝ ընկերությունը դարձել է առաջին օպերատորը, որը ներդրել է տեղեկատվական անվտանգության կառավարման ISO/IEC 27001/2013 միջազգային ստանդարտը (2015 թվականին): Այսօր ևս՝ այդ ստանդարտը հանդիսանում է ընկերության կառավարման կարևոր մաս:

2017-ին Վիվա-ՄՏՍ-ը մուտք է գործում  B2B ֆիքսված կապի շուկա: Ընկերությունը ներկայում տրամադրում է ֆիքսված VoIP ծառայություններ, ֆիքսված լայնաշերտ ինտերնետ և տվյալների փոխանցում, համատեղակայում և կապուղիների տրամադրում: Վիվա-ՄՏՍ-ի կողմից լայնաշերտ ինտերնետի մատակարար, օպտիկամանրաթելային սեփական ցանց ու տեխնոլոգիական հզորություններ, ինչպես նաև բաժանորդային զգալի բազա ունեցող «ADC» ընկերության ակտիվների ձեռքբերումը Հայաստանի հեռահաղորդակցության ոլորտի խոշորագույն գործարքներից էր: Արդյունքում՝ Վիվա-ՄՏՍ-ը զգալիորեն ընդլայնել է լայնաշերտ ֆիքսված ինտերնետի ու հարակից ծառայություններից օգտվող իր բաժանորդների բազան, որը ներառում է իրավաբանական անձանց՝ մասնավոր/կորպորատիվ սեկտորի ընկերություններ, պետական ու համայնքային կառույցներ:

Ընթանում է Վիվա-ՄՏՍ-ի թվային փոխակերպման գործընթացը, որի արդյունքում ընկերությունն իր բաժանորդների առօրյան ավելի հեշտ ու պարզ դարձնելուն ուղղված նշանակալի քայլեր է կատարում: Այսպես՝ 2017 թվականին Վիվա-ՄՏՍ-ը թողարկել է «Իմ Վիվա-ՄՏՍ» բջջային հավելվածը, որը բաժանորդների կարիքներին համապատասխանեցված պարզ լուծում է և թույլ է տալիս բաժանորդին բջջայինի միջոցով վերահսկել հաշվեկշիռը, ընտրել հաղորդակցության անհատական կարիքներին առավել համապատասխան սակագնային պլաններ և ծառայություններ, ակտիվացնել/ապաակտիվացնել օգտագործվող ծառայությունները և այլն:

Տարիների ընթացքում Վիվա-ՄՏՍ-ն արժանացել է մի շարք պարգևների ու մրցանակների:

Տնտեսական և սոցիալական միջավայրի նկատմամբ ցուցաբերած բարձր պատասխանատվության շնորհիվ, 2018 թվականին Վիվա-ՄՏՍ-ին հաջողվել է Հայաստանում առաջին անգամ ներկայացնել ԿՍՊ հաշվետվություն՝ Համաշխարհային հաշվետվությունների նախաձեռնության (Global Reporting Initiative) ստանդարտներին համապատասխան:

2018 թվականին ընկերությունը հզորացրել է ամպային ենթակառուցվածքներն ու ներկայացրել #CloudMTS՝ ծառայությունը: Միաժամանակ՝ Վիվա-ՄՏՍ-ն առաջին օպերատորն է Հայաստանում, որը ձեռք է բերել ISO 37001 և ISO 19600 հակակոռուպցիոն և համապատասխանության համակարգերի միջազգային ստանդարտներին համապատասխանության վկայական: 2019 թվականին Վիվա-ՄՏՍ-ը ՀՀ վարչապետի աշխատակազմի հետ կնքել է համագործակցության հուշագիր՝ հակակոռուպցիոն և ներքին բարեվարքության համակարգի ներդրման շուրջ:

2019թ. օգոստոսին «ՄՏՍ» ՀԲԸ-ը ձեռք է բերել Վիվա-ՄՏՍ-ի բաժնետոմսերի մնացած 20 տոկոսը:

Շարունակելով ընդլայնել իր թվային ծառայությունները՝ 2019 թվականին Վիվա-ՄՏՍ-ը՝ «Շանթ» ՀԸ-ի հետ համատեղ, թողարկել է «ՄՏՍ TV» HD ալիքների հայկական հավելվածը, որը նոր խոսք է հայերեն բովանդակությունն առավել հասանելի դարձնելու գործում: Հավելվածը հնարավորություն է տալիս սմարթֆոնը վերածելու լիարժեք հեռուստացույցի և դիտելու հայկական և արտասահմանյան մի շարք հեռուստաալիքներ և սերիալներ HD որակով՝ Վիվա-ՄՏՍ-ի 3G և 4G/4G+ ցանցերի ծածկույթում, ինչպես նաև՝ Wi-Fi-ի միջոցով:

2020 թվականի սկզբին Հայաստանի հեռահաղորդակցության առաջատար օպերատորն իրականացրել է կորպորատիվ տարբերանշանի ոճային փոփոխություն: Նորացված տարբերանշանը շեշտադրում է ընկերության ռազմավարական ուղղվածությունը դեպի երիտասարդությունն ու թվային աշխարհը՝ համարձակ ու կենսախինդ: Բաժանորդների համար տարիների ընթացքում հարազատ դարձած «Վիվա»-ն, ընկերության ինքնության հիմքն ու խորհրդանիշը, ինչպես միշտ, շարունակում է մնալ անփոփոխ:

Առաջին անգամ Հայաստանում՝ Վիվա-ՄՏՍ-ի կողմից ստեղծվել են սակագնային պլաններ՝ գնային տարբեր սեգմենտներում, որոնց բաժանորդները` կախված սակագնային պլանից, հնարավորություն ունեն անսահմանափակ օգտվելու մի շարք մեսինջերներից և հավելվածներից՝  ակտիվ սակագնային պլանի դեպքում: Խոսքը վերաբերում է այնպիսի հավելվածների, որոնք դարձել են ժամանակակից մարդու առօրյա շփումների անբաժանելի մասնիկը՝ «Zoom», «Skype», Twitter, «Viber», «WhatsApp», «Messenger», «Facebook», «Telegram», «Zangi», «YouTube», «TikTok», «Snapchat», «Netflix»  և «Instagram»:  Այս լուծումները հատկապես օգտակար էին 2020 թվականի ընթացքում COVID-19-ի հետևանքով հեռավար աշխատանքի և ուսուցման ճիշտ կազմակերպման համար:

Այսպիսով՝ Վիվա-ՄՏՍ-ն այսօր շուկայում առաջարկում է շատ ավելին, քան պարզապես ձայնային ու տվյալների փոխանցման ծառայություններն են, այդ թվում նաև՝ մի շարք խաղային, զվարճալիքային, ուսուցողական հավելվածներ, էլեկտրոնային դրամապանակ, բջջային հեռուստատեսություն, ամպային ծառայություններ և օգտակար լուծումներ՝ բիզնեսի ու ֆինանսների արդյունավետ կառավարման համար, և այլն:

Թվային փոխակերպման փուլը, որում Վիվա-ՄՏՍ-ն այժմ գտնվում է, ենթադրում է անցում հեռահաղորդակցության օպերատորից դեպի թվային համալիր ծառայություններ առաջարկող ընկերություն, ինչը համահունչ է ոլորտի զարգացման համաշխարհային միտումներին, ինչպես նաև՝ բաժանորդների աճող կարիքներին ու ակնկալիքներին:

2005 թվականից մինչ օրս Վիվա-ՄՏՍ-ը պետությանը վճարել է ավելի քան 258 միլիարդ դրամի հարկ: Ընկերությունը հեռահաղորդակցության ոլորտը ներկայացնող ամենամեծ հարկատուն է և խոշոր հարկատուների աղյուսակում մշտապես զբաղեցնում է ամենաբարձր հորիզոնականները:

Վիվա-ՄՏՍ-ն այսօր ունի սպասարկման ընդարձակ ցանց՝ 72 սպասարկման կենտրոն՝ Երևանում ու մարզերում, որտեղ տեղակայված են նաև ՄոբիԴրամ-ի մասնաճյուղերը:

Ներկա դրությամբ՝ ընկերությունն ունի 1200 աշխատակից և ավելի քան 2 միլիոն բաժանորդ: