ՎիվաՍել-ՄՏՍ-ը «WebԾիրան» համահայկական 2-րդ օնլայն կինոփառատոնի գլխավոր հովանավորն է

ՎիվաՍել-ՄՏՍ-ի գլխամասային գրասենյակում կայացավ համատեղ մամլո ասուլիս` նվիրված «WebԾիրան» համահայկական 2-րդ օնլայն կինոփառատոնին: Ասուլիսին մասնակցեցին ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, «Ոսկե ծիրան» երևանյան միջազգային կինոփառատոնի տնօրեն Հարություն Խաչատրյանը և Webtv.am ինտերնետ հեռուստատեսության տնօրեն Արայիկ Մանուկյանը:

 «WebԾիրան» 2-րդ համահայկական օնլայն կինոփառատոնը կմեկնարկի 2012 թվականի նոյեմբերի 20-ին և կավարտվի դեկտեմբերի 20-ին: Փառատոնի գլխավոր հովանավորը ՎիվաՍել-ՄՏՍ-ն է:

«Արդեն երկրորդ անգամ ՎիվաՍել-ՄՏՍ-ն աջակցում է մշակութային կարևոր միջոցառում դարձած «WebԾիրան» համահայկական օնլայն կինոփառատոնին, որի կարևոր առանձնահատկություններից մեկն այն է, որ երիտասարդ սերնդի հայ կինոգործիչները գնահատվում են հասարակության կողմից: Վեբ տեխնոլոգիաների և կինոարվեստի եզակի այս համադրությունը քիչ հայտնի կինոգործիչներին հնարավորություն է տալիս իրենց ֆիլմերը ներկայացնելու ավելի լայն լսարանի` առանց զգալի ֆինանսական ներդրումների և առանց սահմաններ հատելու, հնարավորություն է ընձեռում բացահայտելու իրենց  տաղանդը, դառնալ հայտնի և գրավել հանրության, ինչպես նաև ֆիլմարտադրողների ուշադրությունը: Որպես մշակույթի բարեկամ, ՎիվաՍել-ՄՏՍ-ը պատրաստակամ է աջակցել երիտասարդներին` իրենց մշակութային ձեռնարկումներում: Երիտասարդ կինոգործիչներին մաղթում եմ հաջողություն` իրենց ծրագրերի իրագործման հարցում»,- նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Փառատոնը սահմանել է 1 գլխավոր և 2 խրախուսական մրցանակ: Գլխավոր մրցանակակիրը կպարգևատրվի 300 ԱՄՆ դոլարին համարժեք ՀՀ դրամով և հատուկ դիպլոմով, խրախուսական մրցանակի արժանացածները` 100-ական ԱՄՆ դոլարին համարժեք ՀՀ դրամով և հատուկ դիպլոմով: Ամենաշատ դիտումներ արձանագրած ֆիլմը կարժանանա «Համակրանք» խրախուսական մրցանակին և հատուկ դիպլոմի:

«WebԾիրան» 2-րդ համահայկական օնլայն կինոփառատոնի արդյունքները կհրապարակվեն դեկտեմբերի 20-ից 25-ն ընկած ժամանակահատվածում` հատուկ մրցանակաբաշխության ժամանակ: Արդյունքները կամփոփի պրոֆեսիոնալ ժյուրին: 

«WebԾիրան» 2-րդ համահայկական օնլայն կինոփառատոնին ներկայացված ֆիլմերը ցուցադրվելու են բացառապես webtv.am ինտերնետ հեռուստատեսությամբ:
Կինոփառատոնին կարող են մասնակցել Հայաստանում և արտերկրում ապրող բոլոր կինոռեժիսորները` ներկայացնելով մինչև 20 րոպե տևողությամբ, առանց ժանրային և ձևաչափային սահմանափակումների  ֆիլմեր:

«WebԾիրան» համահայկական կինոփառատոնին մասնակցելու համար, անհրաժեշտ է նոյեմբերի 13-ից դեկտեմբերի 10-ն ընկած ժամանակահատվածում DVD ֆորմատով ֆիլմերը ներկայացնել «Ոսկե ծիրան» միջազգային կինոփառատոնի գրասենյակ:

Սպասեք ավելին: ՎիվաՍել-ՄՏՍ... Ավելին` քան օպերատոր: